तनहुँको व्यास नगरपालिकाका ५ जनामा कोरोना पुष्टि, तनहुँमा संकमितको संख्या १२४ पुग्यो

किरण श्रेष्ठ मङ्गलबार, १६ असार २०७७

१६ असार २०७७

तनहुँ । तनहुँको व्यास नगरपालिकाका ५ जनामा कोरोना संक्रमण पुष्टि भएको छ । मंगलबार बिहान स्वास्थ्य निर्देशनालय गण्डकीले जारी गरेको प्रेस विज्ञप्तिमा उक्त संक्रमित बारे जनाइएको छ ।

तनहुँको व्यास नगरपालिकाले बनाएको क्वारेन्टाइनमा बसेका ३ जना पुरुष र २ जना महिलामा संक्रमण पुष्टि भएको हो ।

भारतबाट आएर क्वारेन्टाइनमा बसेका व्यक्तिमा कोरोना पुष्टि भएको व्यास नगरपालिकाका स्वास्थ्य शाखा प्रमुख प्रमोद सोतीले जानकारी दिए ।

योसंगै तनहुँमा कोरोना संक्रमितको संख्या १ सय २४ जना पुगेको छ ।तनहुँमा कोरोनालाई जितेर निको भएर घर फर्किनेको संख्या १६ जना पुगेको छ ।

सोमबार मात्रै जिल्लामा थप १० जना कोरोना संक्रमित थपिएका थिए ।

तनहुँको बन्दिपुर गाउँपालिकाका ९ जना र १ जना घिरिङ गाउँपालिकाका गरि सोमबार तनहुँमा १० जना कोरोना संक्रमित थपिएका हुन ।

बन्दिपुर गाउँपालिकामा थपिएका ९ जना मध्ये जना ४ जना अस्पतालका स्वास्थ्यकर्मी/कर्मचारी र ५ जना भने भारतबाट फर्किएर क्वारेन्टाइनमा बसेका व्यक्ति भएको बन्दिपुर गाउँपालिकाका अध्यक्ष पुर्णसिं थापाले जानकारी दिए ।

तनहुँको कुन स्थानीय तहमा कति कोरोना संक्रमित ?

गत जेठ १८ गते तनहुँमा पहिलो संक्रमित भेटिएको थियो । यो अवधिमा जिल्लामा संक्रमितको संख्या १ सय २४ जना पुगेको छ भने १६ जना निको भएर घर फर्किएका छन् ।

हालसम्म जिल्लाको व्यास नगरपालिकामा १६ जना, ऋषिङ गाउँपालिकामा ३२ जना, भानु नगरपालिकामा ७ जना, घिरिङ गाउँपालिकामा २६ जना, शुक्लागण्डकी नगरपालिकामा ७ जना, बन्दिपुर गाउँपालिकामा १९ जना, आबुखैरेनी गाउँपालिकामा ४ जना (लमजुङको बेशीसहर ठेगाना भई तनहुँको आबुँखैरेनीमा कार्यरत ३८ वर्षीय पुरुष), भिमाद नगरपालिकामा ३ जना, देवघाट गाउँपालिकामा १ जना र म्याग्दे गाउँपालिका ९ जनामा कोरोना संक्रमण पुष्टि भएको छ ।