पोखरा। बिहीबार बिहान गएको भूकम्पका कारण पोखरामा एउटा घर भत्किएको छ। बिहान ३ :५७ बजेको समयमा गएको भूकम्पका कारण पोखरा महानगरपालिका वडा नं -२४ कास्कीकोट स्थित दोपरे निवासी ३९ वर्षीय पूर्ण हरी सुवेदीको घर भत्किएको प्रदेश प्रहरी कार्यालय पोखराले जनाएको छ।

प्रहरीका अनुसार सुवेदीको ढुङ्गा माटोले बनेको र ढुङ्गाले छाएको २ तले ३ कोठा सहितको घर भूकम्पका कारण भत्किएको हो। घर भत्किँदा सुवेदीका १५ वर्षीया छोरी करिश्मा सुवेदी समेत घाइते बनेकी छन्।

घाइते करिश्माको पोखरामा उपचार भैरहेको छ। उनको स्वास्थ्य अवस्था खतरामुक्त रहेको प्रहरीले जनाएको छ। घटनाको सूचना लगत्तै प्रहरी र स्थानीय उद्दार कार्यमा खटिएका थिए।

राष्ट्रिय भूकम्प मापन केन्द्रका अनुसार बिहान ३ बजेर ५७ मिनेटमा कास्कीको धम्पुसलाई केन्द्रबिन्दु बनाएर ४ दशमलव ९ रेक्टर स्केलको भूकम्प गएको थियो।

भूकम्पको धक्का कास्कीसहित आसपासका जिल्लामा महसुस गरिएको थियो।