पोखरा । पोखरामा पहिला काम गरेकै कम्पनीमा चोरि गर्ने युवक नगदसहित पक्राउ परेका छन्। पक्राउ पर्नेमा पोखरा महानगरपालिका २१ घर भइ पोखरा १० बस्ने २१ वर्षीय अजित विश्वकर्मा छन्।

आइतबार दिउँसो २ बजे पोखरा १० रामबजारको सादा पोसाकको प्रहरी टोलीले तीन लाख ६२ हजार ३८० रुपैयाँसहित विश्वकर्मालाई प्रक्राउ गरको हो।

विकले पोखरा १४ विपी मार्गमा रहेको सन्तबहादुर लामिछानेले सञ्चालन गरेको चुलो सेवा प्रालिको झ्याल फोडी पैसा चोरेको अनुसन्धानबाट खुलेको प्रहरीले जनाएको छ। विश्वकर्माले पहिला त्यही कम्पनीमा लेखापालका रूपमा काम गरेका खुल्न आएको छ।

सञ्चालक लामिछानेको काउन्टरबाट सात लाख २५ हजार ३५० रुपैयाँ र नौ हजार भारु हराएको प्रहरीमा जाहेरी दिएका थिए।

विश्वकर्मा अरू पनि चोरीमा संलग्न भए/नभएको बारेमा अनुसन्धान भइरहेको र उनलाई जिल्ला अदालत कास्कीबाट म्याद थप गरी जाँच भइरहेको प्रहरीले जनाएको छ।