गण्डकी प्रदेशसभाको बैठक स्थगित भएको छ । आइतबारबाट बजेटमाथि छलफल गर्ने गरी प्रदेशसभा बैठक आह्वान गरिएकाेमा सरकारको अनुरोधमा अर्को सूचना जारी नभएसम्मका लागि बैठक स्थगित गरिएको गण्डकी प्रदेशसभा सचिवालयका सचिव हरिराज पोखरेलले जानकारी दिए ।

शनिबार बसेको कार्य व्यवस्था परामर्श समितिको बैठकमा बजेट विनियोजनको किताबसमेत तयार हुन नसकेका अवस्थामा अाजको बैठक स्थगित गर्नेमा दलहरूबीच सहमति जुटेको थियो । बजेट किताब आइनसकेकाले बैठक स्थगित गरिएको प्रदेश सरकारका प्रवक्ता कुमार खड्काले जानकारी दिए ।

अर्थमन्त्री रामजी बराल जीवनले मन्त्रिपरिषदबाट पारित भएको भन्दा बेग्लै बजेट प्रदेश सभामा प्रस्तुत गरेपछि मुख्यमन्त्री कृष्णचन्द्र नेपाली पोखरेल मात्रै हाेइन, अरु मन्त्री पनि असन्तुष्ट छन् ।  सत्ता पक्षका सांसदहरुले समेत अर्थमन्त्रीको कार्यप्रति तीब्र आक्रोश व्यक्त गरेपछि प्रदेश सभामा आइतबारका लागि भनिएको बजेटमाथिको छलफलै रोकिएको बुझिएकाे छ । अर्थमन्त्रीको विषयलाई लिएर नेपाली कांग्रेस संसदीय दल र माओवादी संसदीय दलको बैठक आइतबार बस्दैछ ।