नेकपा एमालेले पोखरा महानगरपालिकाको मेयर र उपमेयर टुंगाएकाे छ । शनिबार बसेको सचिवालय बैठकले आसन्न स्थानीय तह निर्वाचनका लागि दीपक पौडेललाई मेयर उठाउने निर्णय गर्दा वर्तमान उपमेयर मञ्जुदेवी गुरुङलाई पुनः उपमेयर उठाउने निर्णय गरेको हो ।

उपमेयरको टिकट पाएकी मञ्जुदेवीले यो पटक उम्मेदवारीका लागि दावी नै पेश गरेकी थिइनन् । तर, अरु ११ दाबेदारलाई छाडेर एमालेले उनलाई टिकट दिएको छ ।

तर, नेतृ गुरुङले अनिइच्छा प्रस्तुत गरेकी छन् । उनले आफूले मैदान खाली गरेको भन्दै चुनाव लड्नेबारे नसोचेको बताइन् । ‘म मेयरमा पनि दाबी नगरेको मान्छे हो, मैले खोजेको पनि छैन । मैले फेरि लड्नेबारे सोचेको छैन,’ उनले भनिन्, ‘१२ जना आकांक्षीलाई मैदान खाली गरेर हिँडेको हो । उम्मेदवार बनाएको औपचारिक जानकारी आएको छैन । यस विषयमा पार्टी केन्द्रमा बुझ्छु ।’

एमाले पोखरा महानगर कमिटीले पार्टीभित्र आन्तरिक उम्मेदवारी माग्दा उनले इच्छा देखाएकी थिइनन् ।