नेकपा एमालेले पोखरा महानगरपालिकाको मेयरमा दीपक पौडेललाई उठाउने निर्णय गरेको छ । शनिबार बसेको सचिवालय बैठकले आसन्न स्थानीय तह निर्वाचनका लागि पौडेललाई मेयर र मञ्जुदेवी गुरुङलाई उपमेयर उठाउने निर्णय गरेको हो ।

मेयरका उम्मेदवार पौडेल एमाले महानगर कमिटीका पूर्वअध्यक्ष हुन् । पोखराको मेयरका लागि १२ जनाले दाबी पेश गरेका थिए । जसमा उपमहासचिव पृथ्वीसुब्बा गुरुङ र संगठन विभाग प्रमुख खगराज अधिकारी समूहबीच प्रतिष्ठाको लडाइँ भएपछि मतदान गर्ने तय समेत भइसकेको थियो । तर अन्तिम समयमा हस्तक्षेप गरेर मतदान राखेको उम्मेदवार छनोटमा पनि कम चर्चामा रहेका पौडेललाई छनोट गरिएको छ । लामो समय शिक्षक आन्दोलनमा जोडिएका उनी ओली निकट मानिन्छन् ।

मञ्जुदेवी अहिले पनि उपमेयर हुन् । उपमेयरको टिकट पाएकी मञ्जुदेवीले यो पटक उम्मेदवारीका लागि दावी नै पेश गरेकी थिइनन् । तर, अरु ११ दाबेदारलाई छाडेर एमालेले उनलाई टिकट दिएको छ ।

सम्बन्धित समाचारः

पोखराको मेयर उम्मेदवार छान्न पृथ्वीसुब्बा र खगराज पक्षबीच संघर्ष