पोखरा । समाजसेवामा सक्रिय युवाहरुको संस्था पहिलो पाइला नेपालले भाेलि शनिवार पोखरामा गर्ने युवा लक्षित नेतृत्व कार्यक्रम “पोखरा लिडरशिप समिट” काे तयारी पूरा भएको छ।

पहिलो पाइला नेपाल, पोखरा शाखाले पत्रकार सम्मेलनको आयोजना गर्दै युवाहरुको भविष्यलाई लक्षित गर्दै कार्यक्रमको आयोजना गर्न लागेको जानकारी दिएको हो ।

सम्मेलन एक दिनको भएपनि त्यसपश्चात युवाको उद्देश्य अनुरुपको कार्यक्रम अघि बढाउने पहिलो पाइलाका केन्द्रिय महासचिव सुरज गिरीले जानकारी दिए । उनले अभियानमा पाँच सय जनाको सहभागिता रहने र देशका विभिन्न क्षेत्रमा आवद्द ६ जना व्यक्तिले आफ्नो भनाइ राख्ने बताए ।

सहभागी युवाहरुका लागि विभिन्न १७ विषय राखिएको र जुन युवालाई जे बन्न मन छ त्यसका लागि संस्थाले कार्यक्रम तय गर्ने पहिलो पाइला नेपालले पोखरा शाखाका अध्यक्ष रञ्जित दनै जानकारी दिए ।

कार्यक्रममा पुर्व आइजिपी सर्वेन्द्र खनाल, वरिष्ठ पत्रकार राजेन्द्र बानियाँ, युवा नेता अब्दुस मिया, गायिका समृद्धि राई, सुजिता बस्नेत र प्रकाश तिवारीको सहभागिता रहनेछ ।