सर्लाही । सर्लाहीको धनकौल गाउँपालिका–५ हरकठवामा आगलागीबाट १३ घर जलेको छ । शनिबार दिउँसो भएको आगलागीमा भाग्ने क्रममा लड्दा एक जना घाइते भएका छन् ।

आगलागीले प्रदीप हजरी, भुमेशवर कानु, ताहिर हजारी, रामबली पासवान, सितल हजारी, भिखारी पासवान, राम बिश्वास हजारी, बिकाउ हजारी, नन्द किशोर पासवान, गगन हजारी, सरप लाल हजारी र रामनाथ हजारीको एक÷एक वटा घर जलेको प्रहरीले जनाएको छ । आगोले घरसहित खाद्यान्न, लत्ताकपडा नष्ट भएको छ ।

आगलागीबाट सिलिण्डर ग्याँस पड्किदा भाग्ने क्रममा ३५ बर्षका अरबिन्द प्रसाद कुशवाह घाइते भएका छन् । उनलाई उपचारको लागि नवलपुरतर्फ पठाइएको प्रहरीले जनाएको छ ।

प्रहरीका अनुसार आगलागीबाट २६ लाख बराबरको क्षति भएको छ । दिउँसो एक बजेदेखि सुरु भएको आगो प्रहरी, स्थानीय बासिन्दा र हरिवन नगरपालिकाको दमकलले तीन घण्टापछि निभाएको थियो ।

आगलागीको कारण भने खुल्न सकेको छैन ।