रामेछाप । रामेछापमा माछा मार्ने क्रममा बम विस्फोट हुँदा एक जना गम्भीर घाइते भएका छन् ।

रामेछाप नगरपालिका–४ हिमगंगाको धारापानी बसेरीस्थित लिखु नदीमा विस्फोटक पदार्थ प्रयोग गरी माछा मार्ने क्रममा स्थानीय ३४ वर्षीय टुकबहादुर श्रेष्ठ गम्भीर घाइते भएका हुन् ।

घाइते श्रेष्ठको स्थानीय साँघुटार स्वास्य चौकीमा सामान्य उपचारपछि थप उपचारको लागि हेलिकप्टर मार्फत काठमाडौँ पठाइएको र अहिले उनको महाराजगञ्जस्थित टिचिङ अस्पतालमा उपचार भइरहेको प्रहरीले जनाएको छ ।

प्रहरीले घटनास्थल आसपासबाट विस्फोटक पदार्थसहित ३ जनालाई पक्राउ गरेको छ । पक्राउ पर्नेमा सिन्धुली कमलामाई–५ का ३० वर्षीय बुद्ध लामा र वडा नं–४ का ५२ वर्षीय रामबहादुर विक तथा भद्रकाली गाउँपालिकाका २९ वर्षीय निल लामा रहेका छन् ।

उनीहरुमाथि विस्फोटक पदार्थ ऐनअनुसार मुद्दा दर्ता गरेर जिल्ला अदालतबाट म्याद थप गरी कारबाहीका लागि अनुसन्धान बढाइने प्रहरीले जनाएको छ ।