काठमाडौं । नेकपा एकीकृत समाजवादीका अध्यक्ष माधव कुमार नेपालले एमाले अध्यक्ष ‘केपी शर्मा ओली’ फेरि सत्तामा आए नेपाललाई सिध्याउने’ आरोप लगाएका छन् ।

पूर्वप्रधानमन्त्री समेतरहेका अध्यक्ष नेपालले केपी ओली नेतृत्वको सरकारले नेपाललाई इन्डोप्यासिफिक रणनीतिको अंग बनाएर सिध्याउने काम गरेको तर आफूहरुले बचाएको दाबीसमेत गरे ।

शनिबार काठमाडौंमा आयोजित एकीकृत प्रगतिशील प्राध्यापक संगठन, नेपालको राष्ट्रिय सम्मेलनमा सम्बोधन गर्दै उनले ओली नेतृत्वको अघिल्लो सरकारका मन्त्री प्रदीप ज्ञवालीले अमेरिकामा गएर नेपाललाई इन्डो–प्यासिफिक रणनीतिको अंग बनाउने समझदारीमा हस्ताक्षर गरेको तर आफूहरुले विरोध गरेपछि अमेरिकाले हटाएको बताए । नेपालले भने, ‘केपी ओलीले सिध्याइसकेका थिए नेपाललाई । ‘फेरी केपी आएपछि त सिध्याइदिन्छन् । त्यो हुनाले हामी रह्यौं भने त्यो बन्दैन ।’

अध्यक्ष नेपालले यथास्थितिमा एमसीसी संसद्बाट पारित गर्ने पक्षमा आफ्नो पार्टी नरहेको पनि बताए ।