काठमाडौँ । सुदूरपश्चिम प्रदेशको भूमि व्यवस्था, कृषि तथा सहकारी मन्त्रालयको गाडी तोडफोड भएको छ ।

आज बिहान नेपाल बन्द गराउँदै हिँडेका बन्दकर्ताहरूले बाँकेको कोहलपुरमा गाडी तोडफोड गरेका हुन् ।

बन्दकर्ताले ढुङ्गा प्रहार गर्दा सुदूरपश्चिम प्रदेश–००१ झ ४०१ नम्बरको गाडीको सिसा फुटेको ट्राफिक प्रहरीले जनाएको छ।

काठमाडौँबाट सुदूरपश्चिम प्रदेश आउँदै गरेको सो गाडीलाई कोहलपुरमा बिहान साढे ५ बजेर तिर ढुङ्गा प्रहार गरिएको प्रहरीले जनाएको छ ।

अमेरिकी सहयोग परियोजना एमसीसी सम्झौता खारेजीको माग गर्दै मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वको नेकपा माओवादी केन्द्र समाजवादी तथा सीपी गजुरेल नेतृत्वको देशभक्त गणतान्त्रिक मोर्चा नेपालले देशव्यापी बन्द आह्वान गरेका हुन् ।