मधेश प्रदेशमा सिके राउत नेतृत्वको जनमत पार्टीका कार्यकर्ताहरुले सांसद अशोक यादवमाथि आक्रमण गरेका छन् । आक्रमणमा परि सांसद यादवको हात भाँचिएको छ।

बुधबार राष्ट्रिय सभा निर्वाचनमा निर्वाचनमा मतदान गर्न जाँदै गरेका यादवको गाडीमा जनकपुरस्थित जानकी मन्दिर अगाडि तोडफोड सँगै उनीमथि आक्रमण भएको थियो ।

त्यस्तै, सर्लाहीको हरिवन नगरपालिकाका मेयर दिनेश प्रसाईं सवार गाडी जनमत पार्टीका कार्यकर्ताले तोडफोड गरेका थिए।

मतदानका लागि जनकपुर पुग्ने क्रममा मेयर प्रसाईं र उपमेयर रेनुका पौडेल चढेको प्रदेश–२–०३००१ झ ००२० नम्बरको गाडीमा उनीहरूले तोडफोड गरेका हुन्। त्यसक्रममा मेयर प्रसाईं घाइते भएका छन्।

उनलाई उपचारका लागि प्रादेशिक अस्पताल लगिएको छ। गाडी पूर्णरूपमा क्षतिग्रस्त भएको छ। सीके राउतका कार्यकर्ताले तिरहुतीया गाछीमा गाडी रोकेर तोडफोड गरेका थिए। भाटासहित प्रदर्शनमा उत्रिएका उनीहरूले गाडी रोकेर तोडफोड र गाडीमा सवार रहेकाहरूलाई आक्रमण गरेको बताइएको छ ।