पोखरा । कोभिड महामारीले मनोरञ्जन क्षेत्र पुरै ध्वस्त बनाएको अवस्थामा पोखरामा शुक्रबार साँझ “मन गुरुङ एटाएर फेसन नाईट” सम्पन्न भएको छ।

एस टि कृयशनको आयोजनामा लेकसाईडमा भएकाे फेशन नाइटमा डिजाईनर मन गुरुङको ड्रेसमा मिस नेपाल ईन्टरनेशनल २०१७ बिजेता तथा सुपर मोडल नीति शाहले र्‍याम्प वाक गरिन्। नीतिलाई साथ दिन पोखराका चर्चित १० मोडलले र्‍याम्प शेयर गरेका थिए। जसको कोरियोग्राफी जेनिता मगरले गरेकी थिईन्।

फेसन डिजाइनर गुरुङले डिजाइन गरेका विभिन्न पोशाक हरुलाई तीन फरक सिक्वेन्समा प्रदर्शन गरिएको कार्यक्रम संयोजक तथा संचारकर्मी सचिन रानाभाटले बताए। करिब १ महिना लगाएर तयार पारिएको पोशाक निकै आकर्षक र भव्य देखिएको थियो।

कार्यक्रमकी प्रमुख अतिथि महिला उद्यमी मिलन थापाले मन गुरुङको कला र कौशलको तारिफ गर्दै महिलाहरु पनि सबल र सक्षम छन् भन्ने उदाहरण गुरुङले प्रस्तुत गरेको बताइन् ।

कार्यक्रमले साथी संसार पोखरामा आश्रित फरक क्षमता भएका २५ जना बालबालिकाहरुलाई पोशाक खाद्यान्न र औषधिको लागि १ लाख १ हजार १ सय एघार रुपैयाँ समेत सहयोग गरेको छ। उक्त रकमको चेक संस्थाका प्रतिनिधि नारायण अधिकारीलाई हस्तान्तरण गरिएको कार्यक्रमकाे अध्यक्षता समेत गरेका सामाजिक अभियन्ता राम रानाभाटले जानकारी दिए ।

डेन्टल बिषयमा स्नातक सकेर डेन्टल हाईजिनिस्टको रुपमा कार्यरत रहेकी मन गुरुङले आफ्नो रुचिको बिषय फेसन डिजाइन भएकोले सन् २०१७ मा आईएफसी फेसन कलेज पोखराबाट डिप्लोमा ईन फेसन डिजाईनिङ कोर्स गरेकी थिईन्। पोखरामा सम्पन्न विभिन्न फेसन सो तथा सुन्दरी प्रतियोगितामा आफ्नो ड्रेसको कौशलता प्रदर्शन गरिसकेकि छ्न्।

“यो मेरो पहिलो तथा एकल फेसन शाे हो, आफूले सिकेको सीपलाई कलाको माध्यमबाट प्रस्तुत गर्दै फेसन डिजाईनिङ क्षेत्रमा फरक नाम लेखाउने उद्देश्यले कार्यक्रम गरिएको हो” – उनी भन्छिन् ।

लेकसाईड स्थित कुटी रिसोर्टमा सम्पन्न कार्यक्रममा करिब तीन सय भन्दा सहभागी रहेकाे आयोजक संस्थाका प्रबन्ध निर्देशक सुरज थापाले बताए। कार्यक्रमलाई ईभेन्ट होस्ट ईनिसा दुराले संचालन गरेकी थिईन्।