काठमाडौँ । नेपाली कांग्रेसको सभापतिमा शेरबहादुर देउवा निर्वाचित भएका छन् ।

मंगलबार भएको दोस्रो चरणको मतदानमा अर्का प्रत्यासी डा. शेखर कोइरालालाई ९०७ मतान्तरले पराजित गर्दै देउवा दोस्रो कार्यकालका लागि सभापति पदमा निर्वाचित भएका हुन् ।

देउवाले २ हजार ७३३ मत प्राप्त गरे भने निकटतम प्रतिद्वन्द्वी कोइरालाले १ हजार ८५५ मत प्राप्त गरेका थिए । ३५ मत भने बदर भएको छ ।

दोस्रो चरणमा ४ हजार ६२३ प्रतिनिधिले मतदान गरेका थिए । सभापतिमा निर्वाचित हुन बहुमत अर्थात २३११ मत चाहिन्थ्यो ।

कुल ४ हजार ७४३ महाधिवेशन प्रतिनिधिमध्ये पहिलो चरणमा ४ हजार ६६९ जनाले मतदान गरेका थिए ।

पहिलो चणमा कुनैपनि उम्मेदवारले ५० प्रतिशत मत ल्याउन नसकेपछि दोस्रो चरणको मतदान भएको हो । पहिलो चरणमा देउवा विरुद्ध उभिएका प्रकाशमान सिंह, बिमलेन्द्र निधि र कल्याण गुरुङले दोस्रो चरणमा देउवालाई सहयोग गर्ने निर्णय गरेपछि उनको जितको आधार तयार भएको थियो ।

यसअघि २०७२ मा भएको १३औं महाधिवेशनमा पनि उनी दोस्रो चरणको मतदानबाटै सभापतिमा निर्वाचित भएका थिए ।