बैतडी । बैतडीमा जन्ती बोकेको जीप दुर्घटना हुँदा ५ जनाको मृत्यु भएको छ । दुर्घटनामा दुई जना गम्भीर घाइते भएका छन् ।

दशरथचन्द नगरपालिका– २ देहिमाडौँबाट जन्ती लिएर सोही नगरपालिकाको वडा नम्बर ६ सिमायलतर्फ जाँदै गरेको म १ ज ३१० नम्बरको जीप दशरथचन्द राजमार्गको कलुवाड मोडमा गएराति साढे ८ बजे दुर्घटना भएको हो ।

जीपमा सवार ५ जनाको घटनास्थलमै मृत्यु भएको बैतडीका प्रहरीले जनाएको छ । मृत्यु हुनेमा दशरथचन्द नगरपालिका–६ का ४८ वर्षका राजेन्द्रबहादुर चन्द, ३८ वर्षका धनबहादुर चन्द, ६५ वर्षका प्रेमबहादुर चन्द, ६५ वर्षका तारासिंह थापा र ५८ वर्षका खेमसिंह कार्की रहेका छन् ।

दुर्घटनामा ४८ वर्षीय हर्कबहादुर चन्द र जीप चालक डडेल्धुराका ४० वर्षीय दीपक माली गम्भीर घाइते भएका छन् । उनीहरुको जिल्ला अस्पताल बैतडीमा उपचार भइरहेको छ ।

जीप सडकबाट सात सय मिटर तल खसेको छ । दुर्घटनाको कारण भने खुल्न सकेको छैन ।