काठमाडौँ । नेपाली कांग्रेसको आसन्न १४ औं महाधिवेशन अन्र्तगत मंगलबार ७ जिल्लाको वडा अधिवेशन भएको छ ।

मंगलबार काठमाडौँसहित मोरङ, सिन्धुपाल्चोक, काभ्रेपलाञ्चोक, कपिलवस्तु, बर्दिया र बाजुरा जिल्लामा वडा अधिवेशन भएको निर्वाचन समितिले जनाएको छ ।

वडा अधिवेशन हुन बाँकी २० जिल्लामा मंगलबार अधिवेशन गर्ने भने पनि १३ जिल्लाको क्रियाशील सदस्यता विवाद समाधान हुन नसकेपछि ती जिल्लामा कार्यतालिका अनुसार वडाअधिवेशन हुन सकेन ।

प्रदेश नम्बर २ का आठ जिल्लासहित सुर्खेत, डोल्पा, रसुवा, रुपन्देही र कैलालीको वडा अधिवेशन सुरु हुन सकेको छैन । महाधिवेशनको कार्यतालिका अनुसार असोज ९ गते गाउँ–नगर अधिवेशन हुँदैछ ।

यस्तै, असोज १२ गते प्रदेशसभा क्षेत्रीय अधिवेशन, असोज १५ गते एकमात्र प्रतिनिधिसभा निर्वाचन क्षेत्र भएका जिल्लाको अधिवेशन र असोज १८ गते दुई वा दुईभन्दा बढी प्रतिनिधिसभा निर्वाचन क्षेत्र भएका जिल्लाको अधिवेशन गर्ने निर्वाचन कार्यतालिका छ । यसैगरी कार्तिक १०, ११ र १२ गते प्रदेश अधिवेशन र मंसिर ९ देखि १३ गतेसम्म केन्द्रीय महाधिवेशन गर्ने तय गरिएको छ ।