पोखरा ।  कास्की प्रहरीले ठूलो मात्रामा अवैध लागु औषधसहित एक जनालाई पक्राउ गरेको छ ।

पोखरा महानगरपालिका वडा नं -१ स्थित बगरमा लागु औषधको अवैध कारोवार भैरहेको भन्ने गोप्य सूचनाका आधारमा जिल्ला प्रहरी कार्यालय कास्कीबाट खटिएको प्रहरीको टोलीले २०१६ एम्पुल लागु औषधसहित एक जनालाई पक्राउ गरेको हो ।

पक्राउ पर्नेमा पोखरा महानगरपालिका वडा नं -१ निवासी ४९ वर्षीय अर्जुन कुमार गुरुङ रहेका छन् ।

कास्कीका प्रहरी नायव उपरीक्षक तथा प्रहरी प्रवक्ता सुवास हमालका अनुसार गुरुङको घरको कोठामा खान तलासी गर्दा प्रहरीले सुटकेस भित्र लुकाई राखेको अवस्थामा डाईजापाम ६७० एम्पुल, फेनेरागन ६७० एम्पुल,
नुर्फिन ६७४ एम्पुल गरी जम्मा २०१६ एम्पुल लागु औषधसहित मोबाईल १ थान र नगद पाँचलाख एक्काईस हजार दुईसय वरामद गरेको हो ।

पक्राउ परेका गुरुङमाथि लागु औषध सम्बन्धी कसुर अन्तर्गत जिल्ला अदालत कास्कीमा १० दिनको म्याद थप गरी अनुसन्धान प्रक्रिया अगाडी बढाइएको प्रवक्ता हमालले जानकारी दिए ।