काठमाडौँ । आज (शनिबार) जून २६ तारिख । लागुऔषध दुरुपयोग तथा अवैध ओसारपसार विरुद्धको अन्तर्राष्ट्रिय दिवस । नेपालमा पनि ‘लागूऔषधरहित परिवारः स्वस्थ जीवनको आधार’ भन्ने राष्ट्रिय नारा तय गरी तीनदिने कार्ययोजनासहित विविध कार्यक्रम संचालन गरी मनाइरहेको छ।

विश्व समुदायलाई लागुऔषधको असर र कारोबारबाट मुक्त बनाउने उद्देश्यका साथ संयुक्त राष्ट्र सङ्घको महासभाबाट सन् १९८७ मा घोषणा भइ हरेक वर्ष जुन २६ तारिखमा यस दिवस मनाउने गरिएको हो ।

संयुक्त राष्ट्र सङ्घको विश्व लागुऔषध प्रतिवेदन २०२१ ले वर्षेनि लागुऔषध प्रयोगकर्ता बढ्दै गएको देखाएको छ ।

लागुऔषध प्रयोगकर्ता सर्वेक्षण २०७६ ले नेपालमा लागूऔषध प्रयोगकर्ताको वार्षिक औसत वृद्धिदर ५ दशमलव ०६ प्रतिशत रहेको आकलन गरेको छ ।

नेपालमा एक लाख ३० हजार ४ सय २४ जना लागुऔषध प्रयोगकर्ता रहेको पछिल्लो प्रतिवेदनमा उल्लेख छ । यो कुल जनसंख्याको झण्डै ०.४८ प्रतिशत हो ।