काठमाडौँ । संसद विघटनसम्बन्धी परेका रिट निवेदनमाथि भएको शुक्रबार (आज) को सुनुवाइ सकिएको छ ।

आज भएको बहसमा न्यायाधीश बमकुमार श्रेष्ठको विषयमा प्रश्न उठेपछि विघटनसम्बन्धी मुद्दाको सुनुवाइ आइतबारसम्मका लागि स्थगित भएको हो ।

बहसमा न्यायाधीश श्रेष्ठलाई संवैधानिक इजलासमा राखिएको भनेर गोविन्द बन्दीलगायत कानुन व्यवसायीले आपत्ति जनाएपछि इजलासमा विवाद भएको थियो । विवादकै बीच शम्भु श्रेष्ठ, रमण श्रेष्ठ, टीकाराम भट्टराईलगायत वरिष्ठ अधिवक्ता, कानुन व्यवसायी बन्दीको भनाइको पक्षमा उभिएका थिए । विवादकै बीच प्रधानन्यायाधीश चोलेन्द्रशम्शेर जबराले आजको सुनुवाइ हेर्दाहेर्दैमा रहेको भन्दै आइतबारसम्मका लागि स्थगित गरेका छन् ।

संसद विघटनसम्बन्धी परेका रिटमाथि प्रधानन्यायाधीश जबराको नेतृत्वमा संवैधानिक इजलास गठन गरेर आज सुनुवाइ सुरु भएको थियो । ३० वटा रिटको सुनुवाइका लागि प्रधानन्यायधीश जबराले आफू र श्रेष्ठसहित दीपककुमार कार्की, आनन्दमोहन भट्टराई र तेजबहादुर केसीको संवैधानिक इजलास गठन गरेका छन् ।