जनकपुरकी स्थायी बासिन्दा दुर्गा भाटले पोखरेली बालबालिकालाई अक्षर चिनाउन थालेको १५ वर्ष बित्यो । उसो त उनी यहीँ हुर्केकी, पढेकी हुन् ।

उनै पोखरेली मिस दुर्गाको कोरोनाकै कारण निधन भएको छ । यद्यपी उनले कोरोना जितिसकेकी थिइन् । कोरोना संक्रमणबाट निम्तिएको निमोनियाले ३६ वर्षीया दुर्गालाई लगिछाड्यो ।

२५ दिनसम्म अस्पतालमा जीवन मृत्युसँग लडेकी दुर्गाको मंगलबार निधन भएको हो । फिस्टेल हस्पिटलपछि चरक मेमोरियल हस्पिटलमा लगिएकी उनको ज्यान बचेन ।

दुर्गा गर्भवती समेत थिइन् । कोरोना संक्रमण र निमोनियाले गाँजेपछि उनको गर्भमा रहेको शिशु खेर गएको थियो । त्यसपछि झनै उनी कमजोर भइन् । पछिल्लो समय कोरोना रिपोर्ट नेगेटिभ आएपनि निमोनियाले शरीर गालिसकेको थियो ।

१२ वर्षदेखि कुमुदिनी होम्स माविमा पढाउँदै आएकी दुर्गा प्राइमरी इन्चार्ज समेत थिइन् । पोखरा रामघाटमा बस्दै आएकी दुर्गाका पति र १ छोरा छन् । उनको आजै अन्त्येष्टि समेत गरिएको छ । कोभिडमुक्त भइसकेका कारण परिवारले आफ्नै परम्पराअनुसार अन्त्येष्टि गर्न पाए ।