काठमाण्डौ । कोरोना संक्रमणका कारण जारी निषेधाज्ञाको अवधिमा ग्राहकले बिजुलीको बिल नतिरे पनि जरिवाना नलाग्ने भएको छ ।

प्राधिकरणका प्रवक्ता मदन तिम्सिनाकाअनुसार निषेधाज्ञा जारी भएपछिको अवधिको महशुल संकलनलाई ‘होलिडे सेटअप’ अर्थात् निषेधाज्ञा अवधिलाई शून्य अवधि माग्ने निर्णय प्राधिकरणले गरेको हो ।

‘अहिले मिटर रिडर घर-घरमा जान सकेका छैनन् । यसकारण निषेधाज्ञा अवधिको समयलाई शून्य गणना गर्ने भनेका छौं,’ उनले भने, निषेधाज्ञा सकिएर महशुल संकलन काउन्टरहरु जहिले खुल्छन्, त्यसपछि नियमअनुसार गणना गरेर महशुल असुल गरिन्छ ।’

मिटर रिडिङ भएको ६० दिनभित्र विद्युत महशुल नतिरेकोलाई प्राधिकरणले जरिवाना लिन्छ । तर जरिवाना तिराउने समयलाई पनि निषेधाज्ञा अवधिभर शून्य गणना गरिनेछ ।

यद्यपि, यो अवधिमा उपभोक्ताले आफै मिटर रिडिङ गरेर अनलाइनमार्फत् बिल भुक्तानी गर्न भने सक्नेछन् ।