पोखराको होटल तथा पर्यटन क्षेत्रमा लामो समय योगदान दिएका कष्ण आचायृको कोरोना भाइरस संक्रमणका कारण निधन भएको छ ।

लेकसाइडस्थित टेम्पल ट्री रिसोर्टका रेजिडेन्ट म्यानेजर रहेका ५२ वर्षीय आचार्यको कोरोनाबाट निधन भएको पुष्टि भएको छ । काठमाडौंका स्थायी बासिन्दा आचार्य फूलबारी रिसोर्टबाट २१ वर्षअघि पोखराको पर्यटन क्षेत्रमा थिए । यसअघि उनले होटल पोखरा ग्रान्डमा समेत जिम्मेवारी सम्हालेका थिए ।

गैह्रापाटनको फिस्टेल हस्पिटलमा उपचाररत उनको सोमबार साँझ निधन भएको हो । हप्ता दिनअघि कोरोनाका लक्षण देखिएपछि चरक अस्पताल पुगेका आचार्य केही बिसेक भयो भनी फर्किएर होटल आइसोलेसनमा बसेका थिए ।

३ दिनअघि फेरि गाह्रो महसुस गरेका आचार्यलाई फिस्टेल हस्पिटल भर्ना गरिएको थियो । उनी बिसन्चो भएको खबरपछि केही दिनयता छोरा काठमाडौंबाट पोखरा आएका थिए, श्रीमती सोमबारमात्रै आइपुगेकी थिइन् ।स्वर्गीय आचार्यका श्रीमती र २ छोरा छन् ।