काठमाडौं । गण्डकीका प्रदेश प्रमुख अमिक शेरचन पदमुक्त हुँदैछन् । उनीसँगै सुदूरपश्चिम प्रदेश प्रमुख शर्मिला त्रिपाठीलाई पनि पदमुक्त गर्न सरकारले राष्ट्रपतिसमक्ष सिफारिस गरेको छ । उनीहरू दुवैजना माओवादी केन्द्रनिकट हुन् ।

मन्त्रीपरिषद्को जारी बैठकले गण्डकी र सुदूरपश्चिम प्रदेशका प्रमुखहरुलाई पदमुक्त गर्न राष्ट्रपति विद्यादेवी भण्डारीसमक्ष सिफारिस गर्ने निर्णय भएको छ ।

गण्डकीमा सीता पौडेल र सुदूरपश्चिममा गंगाप्रसाद यादवलाई नियुक्तको सिफारिस गरिएको छ र नवनियुक्त प्रदेश प्रमुखको केहीबेरमा राष्ट्रपति भवन शीतल निवासमा सपथ ग्रहणको कार्यक्रम तय भइसकेको जनाइएको छ ।

गण्डकी प्रदेशले साढे ३ वर्ष अवधिमा तेस्रो प्रमुख पाएको छ । शेरबहादुर देउवा सरकारले नियुक्त गरेका बाबुराम कुँवरलाई हटाएर नेकपा हुँदा प्रधानमन्त्री ओलीले माओवादीका तर्फबाट अमिक शेरचनलाई नियुक्त गरेका थिए । सत्ताको खेल जारी रहँदा ओलीले अहिले माओवादीका दुई प्रदेश प्रमुख हटाएका हुन् ।

नियुक्तिका लागि सिफारिस गरिएका यादव पूर्वउपसभामुख हुन् भने पौडेल चितवन निवासी हुन् ।