गण्डकी प्रदेशको राजधानी कास्कीको पोखरा महानगरपालिकाभित्र संक्रमित दर बढ्दै गएपछि महानगरभित्र पूर्ण निषेधाज्ञा तयारी गरिएको छ । पूर्ण लकडाउन अघि एक हप्ता पर्ख र हेरको अवस्थामा कास्की प्रशासन पुगेको छ । वैशाख १५ देखि २१ गतेसम्म आंशिक निषेधाज्ञा घोषणा गरेको छ ।

काठमाडौं उपत्यकाभित्र आगामी वैशाख १६ गतेदेखि निषेधाज्ञा घोषणा गरिएसँगै कोरोनाको उच्च जोखिम कास्कीमा पनि निषेधाज्ञा हुनसक्ने आमसर्वसाधारणको अनुमान बमोजिम कास्की प्रशासनले तत्कालै पूर्ण निषेधाज्ञा भने घोषणा गरेन । तर, हिँडडुल बाहेकका अरु सबैजसो क्रियाकलापमा भने बन्देज लाग्ने गरी आदेश जारी गरेको छ ।

वैशाख १५ गतेदेखि नै यातायातमा जोर बिजोर प्रणाली लागु गरिने भएको छ । जोर गतेको दिन जोर नम्बर र बिजोर दिनमा बिजोर नम्बरका सवारी चलाउन पाउनेछन् । खाद्यान्न र अत्यावश्कीय सामाग्रीको पसल बाहेक अरु पनि बन्द हुने, १५ जना भन्दा बढी भेला भएर जन्ती, मलामी जान नपाइने, मनोरञ्जन तथा खेलहरु सबै बन्द हुने आदेश छ ।

पोखरामा संक्रमितको दर बढेपछि अस्पतालमा शय्या समेत पाउन मुस्किल भएको गुनासो आउन थालेको छ ।