काँग्रेस नेता नवीन्द्रराज जोशीको शुक्रबार साँझ निधन भएको छ । पूर्वमन्त्री समेत रहेका उनको नर्भिक अस्पतालमा उपचारका क्रममा शुक्रबार साँझ ८ः२४ बजे निधन भएको अस्पतालले पुष्टि गरेको छ । जोशी इमान्दार छवि भएको नेताका रुपमा चिनिन्थे । २०७४ सालमा उद्योगमन्त्री हुँदा उनले छोटो समयमै राम्रो काम गरेका थिए ।

उनको निधन भएको खबरसँगै काँग्रेस नेताहरुको अस्पतालमा भिड लाग्न थालेको छ । जोशीमा मष्तिष्कघात भएपछि फागुन १४ गते नर्भिक अस्पतालमा भर्ना भएका थिए । मष्तिष्कघात हुँदा रक्तश्राव भई उनको टाउकोमा रगत जमेको थियो । शल्यक्रियापछि उनको स्वास्थ्यमा सुधार भएपनि पछि स्वास्थ्यमा पुनः समस्या देखिएसँगै भेन्टिलेटरमा राखेर उपचार गरिँदै आएको थियो ।

अस्पतालका अनुसार शुक्रबार बिहानदेखि उनको मुटुले समेत काम गर्न छाडेको थियो । उपचारका सबै प्रयास जारी राखिएकै अवस्थामा उनको निधन भएको नर्भिक अस्पतालका वरिष्ठ न्युरो सर्जन डा. राजीव झाले बताएका छन् ।