सर्वोच्च अदालतले फागुन २३ गते नेकपा विवादबारे गरेको फैसलाको नेकपा माओवादी केन्द्र पुनरावलोकनमा जाने भएको छ ।

आज मंगलबार पार्टीको स्थायी समिति बैठक बस्नु अघि कानुन व्यवसायीहरुसँग छलफल गर्दै उक्त फैसलाको पुनरावलोकनमा जाने निष्कर्श निकालेको नेकपा माओवादी केन्द्रका प्रमुख सचेतक देव गुरुङले जानकारी दिए ।

कानुन व्यवसायीहरुको सुझाव अनुसार माओवादी केन्द्र सर्वोच्चको फैसलाबारे पुनरावलोकनमा जाने निष्कर्षमा पुगेको उनले बताए । छलफलमा कानुन व्यवसायीहरु शम्भु थापा, रामनारायण बिडारी, चण्डेश्वर श्रेष्ठ, मुक्ति प्रधान लगायतले नेकपा एमाले र माओवादी केन्द्र ब्युँताउने सर्वोच्चको फैसला राजनीतिक प्रकृतिको भएको र मागदाबी नै नगरिएको विषयमा फैसला आएकोले ६० दिनभित्र पुनरावलोकनमा जान सुझाव दिएका हुन् ।

‘नेकपा विवादमा सर्वोच्चले गरेको फैसला राजनीतिक प्रकृतिको भएकाले पुनरावलोकनमा जाने निर्णय भएको छ ।’, उक्त छलफलपछि संचारकर्मीहरुसँग छोटो प्रतिक्रिया दिँदै उनले भने–‘फैसला आएको ६० दिनभित्र पुनरावलोकनमा जानुपर्ने कानुनी व्यवस्था छ सोही अनुसार हामी पुनरावलोकनमा जान्छौँ ।’