पोखरा – रोजगारको लागि विदेश पठाईदिन्छु भन्दै रकम ठगी गर्नेलाई कास्की प्रहरीले पक्राउ गरी बिहीबार सार्वजनिक गरेको छ ।

विगत लामो समयदेखि आफु विदेश बसेको र युरोप क्यानडा, अमेरिका लगायतका देशमा धेरैलाई रोजगारको लागि पठाइसकेको भन्दै मानिसहरुलाई प्रभावमा पारेर रकम उठाएको भन्ने जाहेरीको आधारमा कास्की प्रहरीले पर्वत जिल्ला मोदी गाउँपालिका -७ स्थायी घर भई हाल पोखरा महानगरपालिका -३० शिसुवा बस्दै आएका ३८ वर्षीय धिरज कुमार विश्वकर्मालाई पक्राउ गरी आज सार्वजनिक गरेको हो।

कास्कीका प्रहरी नायव उपरीक्षक तथा प्रहरी प्रवक्ता सुवास हमालका अनुसार विश्कर्माले विभिन्न ३३ व्यक्तिसंग एकमुष्ट नब्बे लाख एकहत्तर हजार पाँच सय रुपैयाँ उठाएको र विश्वासमा पार्न उनले विभिन्न सहकारी तथा विकास बैंकहरुको समेत चेक दिएका थिए ।

पक्राउ परेका उनलाई ठगी सम्बन्धी कसूर अन्तर्गत जिल्ला अदालत कास्कीबाट पांच दिनको म्याद थप गरी अनुसन्धान कार्य अगाडी बढाईएको प्रवक्ता हमालको भनाई छ ।