पोखरा – शुक्रबार पोखराका १२ जना सहित गण्डकीमा थप १३ जनामा कोरोना पुष्टि भएको छ । आज गरिएको जम्मा ३०४ परीक्षण मध्ये गण्डकीमा थप १३ जनाको परीक्षण रिपोर्ट पोजेटिभ आएको हो ।

प्रदेश स्वास्थ्य निर्देशनालयको आजको एउटा मात्र विज्ञप्ति अनुसार संक्रमितहरु प्रदेशका दुई जिल्ला कास्कीको पोखरा महानगर र तनहुँ जिल्लाका छन् । जसअन्तर्गत पोखरा महानगरपालिकाका १२ जना र तनहुँ बन्दीपुर गाउँपालिकाका थप १ जनाको गरी गण्डकीमा १३ जनाको रिपोर्ट कोरोना पोजेटिभ आएको जारी विज्ञप्तिमा जनाइएको छ ।

आज थपिएका संक्रमित संगै गण्डकीमा कोरोना संक्रमितको कूल संख्या १४ हजार २ सय ५५ पुगेको छ । जसमा सक्रिय संक्रमित १ हजार ७ सय पांच छन् ।

पछिल्लो २४ घन्टामा गण्डकीबाट ५८ जना कोरोनामुक्त भएका छन् । यो संगै, कोरोनामुक्त हुनेको संख्या १२ हजार ३ सय १४ पुगेको छ ।

शुक्रबार गण्डकीमा कोरोनाबाट मृत्यु संख्या छैन । हालसम्म गण्डकीमा कोरोना संक्रमणका कारण ज्यान गुमाउनेको संख्या १९१ पुगेको निर्देशनालयले जनाएको छ ।