पोखरा ५, मालेपाटनस्थित आइसोलेसनबाट सोमबार राति एक जना कोरोना संक्रमित भागेका छन् । कृषि तालिम केन्द्रमा पोखरा महानगरले व्यवस्थापन गरेको सो आइसोलेसनमा रहेका बुटवल घर भइ पोखरा ६ बुलौंदी बस्ने ३३ वर्षीय ति संक्रमित भागेका हुन् ।

र ती पुरुष कार्तिक १६ बाट आइसोलेसनमा बसेका थिए । पोखरा महानगर स्वास्थ्य महाशाखा प्रमुख हेमन्त शर्मा पौडेलले सोमबार राति खाना खाएर सुतेका उनी बिहान कोठामा नभेटिएको बताएका छन् ।

तर, उनीसँगै आइसोलेसनमा बस्नेहरुका अनुसार साँझ खाना खाने बेला साथीसँग कुरा गर्न भन्दै माथिल्लो तल्लामा पुगेको र त्यहींबाट हामफालेर भागेका हुन् । जिल्ला प्रहरी कार्यालय कास्कीका प्रवक्ता डिएसपी सुवास हमालले ति संक्रमित पोखरामा मासु व्यवसाय गर्दै आइरहेको बताएका छन् ।

दशैंका बेला च्यांग्राको मासु बेच्न उनले अरुबाट खरिद गरेका थिए । तर त्यो च्यांग्राको रकम भुक्तानी नगरेको आरोपमा उनीमाथि कास्की जिल्ला अदालतमा मुद्दा दायर भएको थियो । धरौटी बुझाउन नसकेपछि जेल चलान भएका उनी श्रीमतीले धरौटी तिरिसकेको अवस्थामा पनि किन भागे ? यसतर्फ अनुसन्धान केन्द्रित गरिएको प्रहरीले जनाएको छ । २३ लाख रुपैयाँको च्यांग्रा खरिद गर्दा खाली चेक दिएर ठगी गरेपछि उनी पक्राउ परेका थिए ।

उनको प्रहरीले उनको खोजी गरिरहेको छ । आइसोलेसनमा खटिएका सुरक्षाकर्मीले ती पुरुषको घर वरपर खोजी गरिरहेको बताइन्छ । संक्रमित अवस्थामा भागेपछि जोखिम बढेको छ ।