स्याङ्जाको पुतलीबजार नगरपालिकाका प्रमुख प्रशासकीय अधिकृत डोलराज ढकालको निधन भएको छ । उनी रक्त क्यान्सरसँग सुधिरहेका थिए । ५१ वर्षका ढकाललाई पोखरा हुँदै उपचारका लागि काठमाण्डौ लगिएकोमा सोमबार निधन भएको हो ।

प्रमुख प्रशासकीय अधिकृत ढकालको निधनमा पुतलीबजार नगरपालिकाले शोक विज्ञप्ति जारी गरी मेयर सीमाकुमारी क्षेत्रीले नगरपालिका र नेपालको निजामती क्षेत्रले एक कुशल र उच्च प्रशासनिक क्षमता भएको व्यक्ति गुमाउनु परेको उल्लेख गरेकी छन् । उनी गत फागुन २७ गते पुतलीबजार नगरपालिकामा हाजिर भएका थिए ।

निमित्त प्रमुख प्रशासकीय अधिकृतको जिम्मेवारी बाबुराम बरालले सम्हालेका छन् । बरालले विज्ञप्ति निकालेर मंगलबार नगरपालिका र मातहतका सबै कार्यालय बन्द रहने जनाएका छन् । विद्यालयहरुमा जारी परीक्षा भने बन्द नहुने विज्ञप्तिमा उल्लेख छ ।

ढकालको शव पोखरा ल्याएर म‌ंगलबार बिहान नै पोखराको शान्तिघाटमा दाहसंस्कार गरिएको जनाइएको छ ।