आफ्नो जन्मदिनको अवसरमा सामाजिक कार्य गर्दै आएका अनेरास्ववियुका विद्यार्थी नेता बिनोद भण्डारीले यसपटक आगलागी पीडित परिवारलाई सहयोग गरेका छन् ।

अनेरास्ववियु कास्किका नेता बिनोद भण्डारीले गण्डकी मेडिकल कलेज पोखरामा उपचार गराइरहेका बिरामीलाई आर्थिक सहयोग गरेका हुन् । आगोबाट जलेर आइसियूमा उपचाररत शेरबहादुर गुरुङको ४ जनाको परिवारलाइ ५ हजार ५ सय ५५ रुपैँया सहित फलफूल सहयोग गरेका हुन् । गुरुङ परिवारलाई उपचारमा कठिनाइ भएको कारणले आफ्नो जन्मदिनमा सहयोग गरेको भण्डारीले बताए ।

भण्डारीले अघिल्ला बर्षहरुमा पनि आफ्नो जन्मदिनमा अनाथ बालबालिकालाई स्टेशनरी तथा खेलकुद सामाग्री बितरण, सहारा क्लबका खेलाडीहरुलाई जर्सी बितरण लगायतका कार्य गर्दै आएका छन् ।

रातको समयमा कोठामा ग्याँस चुहावट हुँदा आगलागी भएर शेरबहादुरकी श्रीमती सहित ४ जनाको जिएमसीमा उपचार भैरहेको छ । उनीहरु मजदुरी गरेर खाने परिवार भएका कारण आर्थिक कठिनाई रहेको अनेरास्ववियुको नेता शेखर गौतमले बताए ।

दाह्री ग्याङ पोखराका संस्थापक संयोजक गौतमकै पहलमा यी परिवारको कल्याण भएको थियो । उनीहरुको आर्थिक अवस्था अत्यन्त नाजुक रहेको र आफूले उपचारमा सुरुदेखि नै सहयोग गर्दै आएको गौतमले जानकारी दिए ।