काठमाण्डौ -अध्यागमन विभागले कोरोना भाइरसका कारण नेपालमा रोकिएका विदेशी नागरिकहरुको भिसा सेवा शुरु गरेको छ ।

सरकारले कोरोना संक्रमणका कारण लकडाउन जारी गरेपछि बन्द रहेको अन्तर्राष्ट्रिय उडान सेवा भदौ १६ गतेबाट सुचारु भएको छ । उडान खुला भएसँगै नेपालमा लकडाउन र निषेधाज्ञाले रोकिएका विदेशी पर्यटकहरुको भिसा सहजिकरणका लागि सेवा सुचारु गरिएको विभागले जनाएको छ।

विभागले सेवा शुरु गरेपछि पर्यटक भिसा, कामदार भिसा र एनआरएन भिसामा रहेर नेपालमा रोकिएकाहरुलाई आफ्नो देश फर्किन सहज हुने विभागका महानिर्देशक रमेश केसीले बताए ।

भिसाको म्याद सकिएकालाई सेप्टेम्बर १५ अर्थात् भाद्र ३० गते सम्म आफ्नो देश फर्किन समय दिइएको छ । यो समयमा फर्किएमा कुनै शुल्क लाग्ने छैन । तोकिएको समयमा पनि फर्किन नसकेमा डिसेम्बर १५ अर्थात् मंसिर मसान्तबाट लागु हुने गरी हरेकले तीन डलर जरिवाना तिरेर बस्न सक्ने केसीको भनाई छ ।