तनहुँ । तनहुँको व्यास-१ अम्रेनी निवासी कोरोनाबाट मृत्यु भएको ५० वर्षीया महिलाको पोखरा जानुअघि दमौलीको एक मेडिकलमा उपचार भएको खुलासा भएको छ ।

महिलाको मृत्यु पश्चात उनमा कोरोना पुष्टि भएको हो ।

५० वर्षीया महिला पोखरा-१२ हस्पिटलचोक स्थित कास्की सेवा हस्पिटल एण्ड रिसर्च सेन्टरमा उपचार गराइरहेकी थिइन् ।

उनको हिजो सोमबार राति ११ बजेर ३६ मिनेटमा अस्पतालमै उपचारको क्रममा मृत्यु भएको थियो । उनलाई निमोनिया भएपछि अस्पतालमा लगिएको थियो ।

ती महिलाको व्यास-३ दमौलीको प्रजुन थापा मेडिकल हलमा उपचार भएको थियो । गत साउन २८ गते उक्त मेडिकलमा स्वास्थ्य उपचारका लागी महिला आएको मेडिकलका संचालकले जनाकारी दिए ।

उनले भने ‘म सहित हाम्रो ६-७ जनाको स्वाब लिने कुरा भएको छ ।’

‘पसल बन्द गरेर अहिले घरमै छु ।’ उनले भने ‘डर छैन तर सजग भएर बसेका छौ ।’

अहिले मेडिकल सिल गरिएको जिल्ला स्वास्थ्य कार्यालय तनहुँका प्रमुख शंकरबाबु अधिकारीले जानकारी दिए । ‘साउन २८ गते मेडिकल आउनुभाको रैछ ।’ प्रमुख अधिकारीले भने ‘अब महिलाको सम्पर्कमा आएकाको कन्ट्रयाक्ट ट्रेसिङको काम भईरहेको छ ।’

उनले थपे ‘अब कन्ट्रयाक्ट ट्रेसिंङ सकिने बित्तिकै पीसीआरका लागि स्वाब संकलन गर्छौ ।’

स्वास्थ्य उपचारका लागि पोखरा गएकी ५० वर्षीया महिलाको उपचारका क्रममा पोखराको कास्की सेवा अस्पतालमा मृत्यु भएको हो । ती महिला गत साउन ३२ गते उपचारका लागि पोखरा गएकी थिइन् ।

करिब २ हप्ताअघि ती महिला भानु नगरपालिकाको भन्सारमा आफन्तकहाँ गएर आएकी थिइन् । भानुमा कोरोनाको समुदाय संक्रमण देखिएकाले त्यहींबाट संक्रमण फैलिएको आशंका गरिएको छ । भानुमा समुदायका २४ जनामा कोरोना संक्रमण पुष्टि भएको छ ।

मृत्यु भएकी महिलामा मधुमेहसँगै मुटुरोगको समस्या रहेको थियो । दीर्घरोगी महिलालाई उपचारका पोखरा उनको छोरी र व्यास-१ गल्बुबेसीका आफन्तले लिएर गएका थिए ।

तनहुँमा कोरोनाको अवस्था

तनहुँमा कोरोना संक्रमणबाट यो पहिलो मृत्यु भएको हो । तनहुँमा अहिलेसम्म २१८ जनामा कोरोना संक्रमण पुष्टि भएको छ भने १८२ जनाले कोरोना जितेर निको भई घर फर्कीसकेका छन् ।

अहिले ३५ जना आइसोलेसनमा उपचाररत छन् । त्यस्तै अहिलेसम्म १ जनाको मृत्यु भएको छ ।

तनहुँको भानुमा २४, देवघाटमा २, बन्दीपुरमा १ र व्यासमा ५ जना गरी समुदायका ३२ जनामा कोरोना भाइरस संक्रमण पुष्टि भएको छ ।

कोरोना भाइरस संक्रमण समुदायस्तरमा देखिन थालेपछि जिल्ला प्रशासन कार्यालय तनहुँले जिल्लाका दुइ वटा नगरपालिकामा निषेधाज्ञ जारी गरेको छ ।

यस्तै जिल्लाका तीन वटा गाउँपालिकामा भने लकडाउन गरिएको छ । समुदायका व्यक्तिमा कोरोना संक्रमण पुष्टि भएसंगै तनहुँको व्यास नगरपालिकामा सोमबार दिउँसा १२ बजेदेखि लागु हुने गरी भदौ ७ गते दिनको १२ बजेसम्मका लागि निषेधाज्ञ जारी गरिएको छ ।

यस्तै भानु नगरपालिकामा भने भदौ १४ गतेसम्मका लागि निषेधाज्ञ जारी गरिएको प्रमुख जिल्ला अधिकारी सागर आचार्यले बताए ।

यो पनि :

ब्रेकिङ न्यूजः कोरोनाबाट पोखरामा महिलाको मृत्यु, कास्की सेवा हस्पिटलमा मृत्यु भएकी तनहुँकी महिलामा देखियो कोरोना

पाेखरामा मृत्यु भएकी काेराेना संक्रमित महिला तनहुँ अम्रेनीकी, डायबिटिज र मुटुराेगी !