तम्घास – गुल्मीको रुरुक्षेत्र गाउँपालिकामा शुक्रबार राती गएको पहिरोमा परी एकै परिवारका चार जनाको मृत्यु भएको छ ।

जिल्ला प्रहरी कार्यालय गुल्मीका अनुसार रुरुक्षेत्र गाउँपालिका – ५ टाहाटिम नजिकै आँटीपाटामा शुक्रबार अन्दाजी ९ बजेको समयमा आएको पहिरोमा परी स्थानीय राजु माझीको घर पहिरोले पुरिएको हो । पहिरोमा पुरिएर राजु बोटेमाझीकी ३०  बर्षीया श्रीमती, छोराहरु वर्ष १० का हेमन्त, वर्ष ७ का सागर र दश महिनाकी छोरीको मृत्यु भएको हो ।

शुक्रबार बेलुकी ५ बजेदेखि अविरल वर्षा भइरहेको कारण राति घर माथिबाट ठूलो चट्टानसहितको पहिरो खसेकाले घर पुरिएको बताइएको छ । पहिरोमा परेर ज्यान गुमाएका चारै जनाको शव निकाली सकिएको छ । घटनाको जानकारी पाएपछि इलाका प्रहरी कार्यालय रिडी र प्रहरीचौकी जोहाङ्ग खैरेनीबाट प्रहरी टोली घटनास्थलतर्फ गएको छ । राजु भने वैदेशिक रोजगारीमा रहेको बताइएको छ ।