अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहमा रहेका उपाध्यक्ष बामदेव गौतम प्रधानमन्त्री एवं अर्का अध्यक्ष केपीतिर लागेका छन् ।

यससँगै ९ सदस्यीय सचिवालयमा अब प्रचण्ड-नेपाल पक्षका ५ र ओली पक्षमा चार नेता भएका छन् । तर ओली पक्षले भने गृहमन्त्री रामबहादुर थापा पनि यता रहेको दाबी गरेका छन् । यसो भएमा नेकपा सचिवालयमा प्रधानमन्त्री एवं अध्यक्ष ओलीको पक्षमा बहुमत पुग्नेछ । तर, थापा भने ओलीतिर नरम देखिएपनि ओलीको कार्यशीलीले आजित भएर अब समृद्धिको यात्रा ओली नेतृत्वमा नहुने बताइसकेका छन् ।

विगतमा ओलीलाई पार्टी अध्यक्ष बनाउनेदेखि संसदीय दलको नेता बनाउनसम्म गौतमले साथ दिए । र, उनको साथले नै ओलीले यी पदहरु पाए । गौतमलाई भने ओलीले हिँस्स बुढी खिस्सँ दात जस्तो बनाइरहेका छन् । पछिल्लो क्रममा ओली आफैले अध्यक्षता गरेको बैठकले गरेको निर्णय समेत ओलीले आफै मान्दिन भनेर गौतमलाई फेरि हिस्स बनाए । उनलाई राष्ट्रियसभा सदस्य बनाउन ओलीले नै तगारो लगाए । तर पनि गौतमले ओलीमा माया मार्न सकेका छैनन् ।

गौतमले पार्टी नेताहरुसामू ओलीलाई एकता महाधिवेशनसम्म अध्यक्ष र प्रतिनिधिसभाको यस कार्यकालको अवधीभर प्रधानन्त्रीको जिम्मेवारीमा राख्ने प्रस्ताव अघि सारेका छन् ।

प्रचण्डलाई एकता महाधिवेशसम्म सम्पूर्ण कार्यकारी अधिकारसहित अध्यक्षको जिम्मेवारी दिने र पार्टीको एकता महाधिवेशन सहमतिमा गर्ने गौतमको प्रस्तावमा उल्लेख छ । गौतमले पार्टीको बिग्रह रोक्नका लागि भन्दै अघि सारेको प्रस्ताव प्रधानमन्त्री ओलीले लिँदै आएको अडान हो ।

नेकपा एक नेताका अनुसार गौतमले ६ बुँदे यो प्रस्ताव औपचारिक बैठकमा नराखेको तर नेताहरुलाई दिएको स्वीकार गरेका छन् । गौतमको सचिवालयले पनि यो आधिकारिक रहेको भनिसकेको छ ।