रञ्जन अधिकारी  पोखरा, १२ माघ / विभागीय टोली नेपाल पुलिस क्लब पोखरामा जारी आहा रारा गोल्ड कप फुटबल प्रतियोगिताको क्वार्टरफाइनलमा प्रवेश गरेको छ । शुक्रबार पोखरा रंगशालामा भएको चौथो तथा अन्तिम प्रि–क्वार्टरफाइनल खेलमा पुलिसले रमपम झापा ११ विरुद्ध शुन्यका विरुद्ध एक गोलले जीत हात पारेको हो ।

दुई वर्ष अघि १४ औं संस्करणमा भने पुलिसलाई झापा ११ ले २–० गोलले पराजित गरेको थियो । पुलिस गत वर्ष संकटा क्लबसँग पहिलो खेलमै पराजित भएको थियो । लगातार दुई वर्ष दोस्रो खेल खेल्न नपाएको पुलिसलाई यो वर्ष दोस्रो चरण प्रवेश गराउन सुमन लामाको गोल निर्णायक बन्यो ।

लामाले खेलको १३ औं मिनेटमा गोल गरेका हुन् । मैदानको मध्य भाग नजिकैबाट बल प्रयासमा दुई विपक्षी डिफेन्डरलाई छक्याउँदै उनले बललाई जाली चुमाए । क्वाटरफाईनल प्रवेश गरेको पुलिसले अब माघ १६ गते डिफेण्डिङ च्याम्पियन मनाङ मस्र्याङदी क्लबसँग प्रतिस्पर्धा गर्नेछ ।

झापा ११ ले गोल गर्ने अवसर पाए पनि सदुपयोग नगर्दा अन्तिम ८ मा स्थान बनाउन असमर्थ रह्यो । खेलको २८ औं मिनेटमा बिक्रम लिम्बुले हानेको कर्नरमा खामिर घिल्सेन कन्डन्वाले करिब २० यार्ड नजिकबाट प्रहार गरेको बल पोष्ट माथिबाट बाहिरिएको थियो ।

त्यसैगरी दिलेन लोक्तान, पुजन उपरकोटी, निरोज बस्नेत लगायतका खेलाडीहरुका केहि अवसर खेर गएका थिए । पुलिसका गोलरक्षक शत्रुघन चौधरीले केहि प्रहार राम्रो बचाउन गरे । पाँचौ सहभागिता जनाएको झापा ११ ले आहा राराको सेमिफाईनल भन्दा माथिको यात्रा तय गर्न सकेको छैन । यसअघि, झापाले २०७२ मा पुलिसलाई पराजित गरेको थियो भने २०५९ सालमा पुलिससंग पराजित भएको थियो ।

नयाँ र युवा खेलाडी उतारेको पुलिसले पोखराबाट उत्कृष्ट प्रदर्शन गरेर लय समात्दै पुरानो विरासत जोगाउने सन्देश दिएको छ । पुलिसले रक्षापंक्ति बलियो बनाउँदै काउण्टर अट्याकलाई प्राथमिकता दियो । जुमनु राई जस्ता अनुभवी खेलाडी पुलिसले मैदान उतारेन । पुलिसका रवि पासवानले खेलको २८ औं मिनेटमा सिक्स यार्ड नजिकबाट प्रहार गरेको बल विपक्षी गोलरक्षक किशोर गिरीले उत्कृष्ट बचाउ गरे ।

५६ औं मिनेटमा निरकुमार राईले गरेको हेड प्रहार पनि खेर गयो । ६५ औं मिनेटमा निरकुमारको पासमा पेनाल्टी एरियामा विपक्षी गोलकिपर एक्लै हुँदा पनि सन्तोष हेमरुनले गोल गर्न सकेनन् ।

नेपाल पुलिस क्लबका प्रशिक्षक अनन्त थापाले नयाँलाई अवसर दिँदा गोल अन्तर कम भएको प्रतिक्रिया दिए । पुलिस क्लबले लय समाती नसके पनि रणनीति अनुसार नै खेलाडीले खेल खेलेको भन्दै परिणामप्रति सन्तुष्टी जनाए ।

झापा ११ का प्रशिक्षक प्रवेश कटुवालले टिम सेट नहुँदा पराजित हुनुपरेको बताए । देवेन्द्र तामाङ, विशाल राईलगायतका खेलाडी नहुनु र ६/७ जना नयाँ खेलाडीलाई एकैपटक मैदानमा उतारेपछि खेलको तालमेल नमिल्दा पराजित हुनुपरेको उनको भनाइ थियो । शुक्रबारको खेलमा नेपाल पुलिस क्लबका रवि पासवान म्यान अफ दी म्याच घोषित भए । उनलाई नगद ५ हजारसहित ट्रफी प्रदान गरियो ।

यो खेलसँगै क्वार्टरफाइनल समिकरण पूरा भएको छ । शनिबार पहिलो क्वाटरफाईनल खेलमा सिधै बाई पाएको पाहुना टोली बंगलादेशको उत्तर बरिन्धरा क्लव र सुदुरपश्चिमाञ्चल ११, स्पोर्टिङ क्लव बिच खेल हुनेछ । बंगलादेशको यो क्लब पोखरामा नयाँ हो । उद्घाटन खेलमा आयोजक सहारालाई ३–० गोलले पराजित गर्दै क्वाटरफाईनलमा यात्रा बनाएको सुदुरपश्चिम स्पोर्टिङको भने यो दोस्रो सहभागिता हो । गत वर्ष पहिलो खेलमै सहारा क्लबसँग ४–० ले पराजित भएको थियो । १३ औं संस्करणमा सुदुरपश्चिम कैलालीको टीमले सेमिफाईनलसम्म स्थान बनाएको थियो ।

क्वार्टरफाईनल समिकरण पूरा

क्वार्टरफाईनलमा पाहुना टोली बंगलादेशको उत्तर बरिन्धरा क्लबसँगै नेपालका तीन सशक्त टोलीहरु मनाङ मस्र्याङ्दी क्लब, थ्रीस्टार क्लब, त्रिभुवन आर्मी ईन भएका छन् । शनिबार बरिन्धरा र सुदुरपश्चिम खेल्दा माघ १४ गते दोस्रो क्वार्टरफाईनल खेलमा त्रिभुवन आर्मी र धरान फुटबल क्लब खेल्नेछन् ।

यस्तै, माघ १५ गते थ्रीस्टार क्लब र सशस्त्रको एपीएफ अन्तिम चारका लागि भिड्नेछन् । माघ १६ गते अन्तिम क्वार्टरफाईनल खेलमा मनाङ मस्र्याङ्दी क्लब र नेपाल पुलिसबीच प्रतिष्पर्धा हुनेछ । शनिबार इटहरीमा जारी मदन भण्डारी मेमोरियल इटहरी गोल्डकपको फाइनलमा मनाङ र थ्रीस्टारबीच फाईनल हुँदैछ । खेल पश्चात् टीम पोखरा आउनेछ ।

आजको खेल
उत्तर बरिन्धरा क्लब, बंगलादेश Vs सुदुरपश्चिमाञ्चल ११ स्पोर्टिङ क्लब