कास्कीको मादी गाउँपालिका वडा नं. ४, घामनुङमा आफ्नै काकालाई खुकुरी प्रहार गरी हत्या गर्ने भतिज प्रहरी फन्दामा परेका छन् । ८० वर्षीय बृद्ध पिताम्बर सापकोटाको हत्या गर्ने उनकै भतिज ५५ वर्षका नवराज सापकोटालाई कास्की प्रहरीले पक्राउ गरेको हो ।

अर्का काका ७७ वर्षीय केशवराज सापकोटाको उपचार भइरहेको छ । घरयासी विवादमा हत्या गर्नेसम्मको जघन्य अपराध गरेका अभियुक्त नवराज मास्टर डिग्री होल्डर भूतपूर्व शिक्षक समेत हुन् ।

कास्की प्रहरीका अनुसार शनिबार बेलुकी साढे ६ बजेतिरको समयमा उनले दुई काकाहरुलाई खुकुरीले छप्काएका थिए । दुवै जना घाइतेको उद्धार गरी उपचारार्थ अस्पताल लगिएको थियो ।

पोखरा १३ कसेरीबाट आज बिहान साढे ५ बजे नवराजलाई प्रहरीले पक्राउ गर्न सफल भएको हो । घटनामा प्रयोग भएको खुकुरी समेत बरामद गरिएको कास्की प्रहरीले भर्चुअल पत्रकार सम्मेलनमार्फत जानकारी दिएको छ ।