काठमाडौं– सभामुख कृष्णबहादुर महरामाथि लागेको जबरजस्ती करणीसम्बन्धी आरोपबारे प्रहरीले अनुसन्धान शुरु गरेको छ । प्रहरीले पीडित भनिएकी महिलाको कोठाबाट घटनासँग सम्बन्धित सबूत प्रमाण संकलन गरेको हो । प्रहरीले प्रारम्भिक अनुसन्धानका लागि घटनास्थललाई ‘नियन्त्रणमा लिएर’ आवश्यक प्रमाण संकलन थालेको हो ।

‘तत्कालनका लागि घटनास्थलबाट रक्सीका बोत्तल, चस्माको फुटेको सिसा, रक्सी पिउन प्रयोग गरिएका गिलास लगायत सामग्री बरामद भएको छ,’ महानगरीय प्रहरी परिसर काठमाडौं स्रोतले भन्यो । प्रहरीले बरामद भएका सामग्रीको फरेन्सिक परीक्षणको प्रक्रिया शुरु गरिएको पनि जनाएको छ ।

प्रहरीले पीडित भनिएकी महिलाको डेरा क्षेत्रमा जडित सीसीटीभी क्यामेराको फुटेज समेत संकलन गरेर अनुसन्धान थालेको छ । संघीय संसद सचिवालयमा कार्यरत महिला कर्मचारीले सोमबार साँझ सभामुख महराले आफ्नै कोठामा आएर आफूमाथि बलात्कार प्रयास गरेको आरोप लगाएकी थिइन् ।

आफूमाथि बलात्कार प्रयासको आरोप लागेपछि सभामुख महराले घटनाको अनुसन्धानमा सघाउनका लागि भन्दै मंगलबार पदबाट राजीनामा दिएका छन् ।