काठमाडौं ।कैलालीको गौरीगंगा नगरपालिका–५ का २५ वर्षीय रामबहादुर कलेल आफ्नी तीन वर्षीया छोरी अनुष्कासहित दाइको घरमा गए । घरमा सुख–दुःखका कुरा भए । साँझ ८ बजे रामबहादुर र उनकी छोरी अनुष्काले दाजुुकै परिवारसँग बसेर खाना खाए ।

खाना खाइसकेपछि छोरी अनुष्कालाई लिएर रामबहादुर सुत्नका लागि कोठामा गए । मध्यरातमा कोठाबाट कोही कराएको आवाज आयो । कोठाबाट आवाज आएपछि परिवारका सदस्यले ढोका खोल्ने प्रयास गरे । तर, ढोका भित्रबाट लगाइएको थियो । त्यसपछि उनीहरुले बल प्रयोग गरेर ढोका खोले ।

जिल्ला प्रहरी कार्यालय कैलालीका प्रहरी नायब उपरीक्षक (डीएसपी) दक्षकुमार बस्नेतका अनुसार कोठामा तीन वर्षीय अनुष्का मृत थिइन् भने रामबहादुर छटपटाइरहेका थिए । रामबहादुरलाई तत्काल अस्पताल लगियो । तर, उनको पनि बाटोमै मृत्यु भयो ।

प्रारम्भिक अनुसन्धानका क्रममा रामबहादुरले छोरीलाई सल्पास नामक विषादी खुवाएर आफूले पनि सेवन गरेर आत्महत्या गरेको खुलेको छ । २५ वर्षीय रामबहादुर पसल गर्दै आएका थिए । गत वैशाख १६ गते रामबहादुर कलेलकी श्रीमती सरिता कलेलले समेत कोठामै झुण्डिएर आत्महत्या गरेकी थिइन् । श्रीमतीले आत्महत्या गरेपछि रामबहादुरविरुद्ध माइती पक्षले आत्महत्या दुरुत्साहनको मुद्दा हालेका थिए । दुरुत्साहन मुद्दामा जेठ २६ गते जिल्ला अदालत कैलालीले कलेललाई पुर्पक्षका लागि जेल चलान गरेको थियो ।

डीएसपी बस्नेतका अनुसार साउन २२ गते अदालतले निर्दोष ठहर गरेपछि कलेल छुटेका थिए । छुटेको झण्डै डेढ महिनापछि रामबहादुरले छोरीसहित आत्महत्या गरेका हुन् । डीएसपी बस्नेतले आत्महत्याको कारण खुल्न नसकेको बताए । रामबहादुरले श्रीमतीको आत्महत्यापछि विरक्तिर आफूले समेत आत्महत्या गरेको हुनसक्ने आशंका प्रहरीको छ ।