गण्डकी प्रदेशका मुख्यमन्त्री पृथ्वी सुब्बा गुरुङ भदौ पहिलो साता बेलायत जाने भएका छन् । तमु धिँ, यूकेको आयोजनामा भदौ ७ र ८ गते हुने नेपाली मेलामा सहभागी हुन मुख्यमन्त्री गुरुङ त्यसतर्फ जाने निर्णय भएको गण्डकी सरकारले औपचारिक जानकारी दिएको छ ।

सरकारका प्रवक्ता रामशरण बस्नेतले गत साउन १६ गते बसेको ब्याबिनेट बैठकको निर्णय आइतबार सार्वजनिक गर्दै यस्तो जनाएका हुन् । साथै, बैठकले मुख्यमन्त्रीको भ्रमणको लागि नेपाल सरकारसँग स्वीकृतिको लागि सिफारिस गरेको उनले जनाए ।  मेलामा सहभागी हुन जाँदा प्रदेश सरकारको कुनै पनि आर्थिक दायित्व नहुने बस्नेतले स्पष्ट पारेका छन् ।

यो उनको दोस्रो विदेश भ्रमण हो । यसअघि गत वर्ष असोज ९ देखि १५ गतेसम्म हाइनान प्रान्तका सरकार प्रमुखको निमन्त्रणामा मुख्यमन्त्री गुरुङ चीन गएका थिए । हाइनान प्रान्तको विशेष प्रान्तीय दिवसमा मुख्यन्त्री गुरुङलाई निम्तो थियो ।