कास्की प्रहरी प्रवक्ताबाट लमजुङ प्रहरी प्रमुखका रुपमा सरुवा भएका प्रहरी नायव उपरिक्षक (डिएसपी) रविन्द्रमान गुरुङले घरेलु मदिरालाई नियन्त्रण गर्ने घोषणा गरेका छन् । उनले जिल्लाको शान्ति सुरक्षासँगै घरेलु मदिराको व्यवस्थापनलाई मुख्य प्राथमिकतामा राख्ने बताएका हुन् ।

बुधबार जिल्लाका सञ्चारकर्मीहरुसँग परिचयात्मक अन्तरक्रिया गर्दै गुरुङले सबै अपराधको मुख्य जड मदिराको प्रयोग भएको भन्दै यसको व्यवस्थापनलाई मुख्य प्राथमिकतामा राखेको बताए । उनले अपराध हुन नदिन र भईसकेका घटनाहरुमा प्रहरी कारवाहीलाई शून्य सहनशिलतामा विशेष कार्ययोजना बनाएर अघि बढ्ने बताए ।

उनले जिल्लामा समूदायमा हुने अपराध जन्य क्रियाकलाप, महिला हिंसा, बलत्कारजस्ता जघन्य अपराधमा कुनै सम्झौता नहुने दाब गरे । उनले जिल्लामा शान्ति सुरक्षा व्यवस्थापनको विषयमा अध्ययन गर्दा ठूला अपराधिक क्रियाकलाप नरहेको दावी गरे । घरेलु मदिरा, जुवातास, पर्यटन र जलविद्युतसँग जोडिएका संवेदनशिलता र केही तस्करीजस्ता विषयलाई प्राथमिकतामा राखेको उनको भनाई छ ।