पोखरा । नेपाली कांग्रेसका संसदीय दलका नेता कृष्णचन्द्र नेपालीले प्रदेश सरकारले सदनमा छलफल नगरी पोखरामा ‘इन्जोय जोन’ बनाउने धोषणा गरेको भन्दै यसले धर्म संस्कृतिमा नकारात्मक असर पर्ने तर्क गरेका  छन् । बुधबार भएको प्रदेश सभाको चौथो अधिवेशनको पहिलो बैठकमा बोल्दै नेता नेपालीले प्रदेश सरकारले ‘इन्जोय जोन’ का लागि भन्दा पर्यटकीय गन्तव्यहरुमा लगानी गर्नु उचित हुने प्रस्टाए ।

‘पोखरामा ‘इन्जोय जोन’ बनाउने बिषयमा सदनमा छलफल नै नभएको कुरा एकाएक बाहिर आउँदा अचम्मित भएँ । ‘इन्जोय जोन’ रेडलाइट एरियामात्र हैन लागु पदार्थ सेवनको केन्द्र समेत हुन सक्छ’ उनले भने ‘इन्जोयजोनको डिपिआर बनाउन ९ करोड विनियोजन गरेको कुरा सुनिन्छ । मन्त्री, मुख्यमन्त्रीले पोखरामा रेडलाइट एरियाको प्रशंग उठाउँदा यसले हाम्रो धर्म, परम्परा, संस्कृतिमा गम्भिर असर पार्छ । यस्तो बिषयमा सरकारले लगानी गर्नु भन्दा पर्यटकीय गन्तव्यहरुमा लगानी गर्नु पर्छ ।’