पोखरा। आगामी साउन १ गतेदेखि लेखनाथमा बन्दै गरेको अन्तराष्ट्रियस्तरको चिडियाखाना (जुलोजिकल पार्क) सञ्चालनमा आउने भएको छ ।

युनाइटेड क्लब पोखराको विशेष पहल एवं स्थानीयवासीको सक्रियतामा १३४ हेक्टर क्षेत्रफलमा बन्दै गरेको जुलोजिकल पार्क निर्माण कार्य अन्तिम चरणमा पुगेको बताउँदै आगामी साउन १ गतेदेखि सञ्चालनमा ल्याउने युनाइटेड क्लब पोखराका अध्यक्ष हिमालय बख्रेलले जानकारी दिए ।

पार्कभित्र वन्यजन्तु उद्धार केन्द्र सञ्चालनमा रहेको छ र हाल नीलगाई, अजिङ्गर, विभिन्न प्रजातिका चरा, मृग, बाह्सिंङ्गा, गिद्ध, वनबिरालो, बाँदरलगायतका जनावर राखिएको छ ।

क्लबले प्रत्येक वर्ष पोखराको अमरसिंहचौरमा गर्दै आएको पोखरा महोत्सवको आम्दानीको २० प्रतिशत रकम चिडियाखाना निर्माणकै लागि छुट्याउने गरेको छ । पार्कभित्र वन्यजन्तु उद्धार केन्द्र निर्माणका साथै जनाबर राख्ने विभिन्न केज, वन्यजन्तुका लागि पानीट्याङ्की, प्रवेशद्वार, टिकटघर, बाटो निर्माणलगायतका कामलाई तीव्रता दिइएको छ ।