महोत्तरी – केटी भगाएको भन्दै महोत्तरीको सोनमा गाँउपालिकामा जनप्रतिनिधिहरु नै कुटपिट गरेका छन् । गाँउपालिका वडा नम्बर १ की सुधा यादवलाई स्थानीय राजु साहसँग भगाउनको लागि सहयोग गरेको भन्दै स्थानीय शंकर शाहलाई जनप्रतिनिधिहरु कुटपिट गरेका हुन् ।

वैशाख १८ गते भएको घटना मिलाउन आयोजित पञ्चायत भइरहेको समयमै वडा कार्यालयकै परिसर भित्र वडाअध्यक्ष अशोक यादव, गाउँपालिका प्रमुख राजकुमार यादव र प्रमोद यादवले हातखुटा बाँधी निर्घात कुटपिट गरेको पीडित शंकर शाहले बताए ।

घाइते अवस्थामा रहेको आफूहरुलाई घटनास्थलमा रहेका प्रहरीले पनि अस्पताल नलगेर घरमा छाडेको पीडितले गुनासो गरे । भागेको केटीलाई २४ घण्टाभित्र फिर्ता ल्याउन गाँउपालिका प्रमुख यादवले चेतावनी दिएको भन्दै शाहले दुखेसो पोखे ।

घटनाको इलाका प्रहरी कार्यालयमा उजुरी दर्ता भएको र चाँडै नै यस सम्बन्धमा छानबिन प्रक्रिया अगाडि बढाइने प्रहरीले जनाएको छ ।