सिरहा : मधेस गठबन्धनको पहिलो दुई दिने राष्ट्रिय परिषद् बैठकमा पत्रकार र सुरक्षार्कीलाई प्रवेशमा रोक लगाईएको छ ।

सरकारसँगको सहमतिपछि सिके राउत नेतृत्वको स्वतन्त्र मधेस गठबन्धनको आइतबारदेखि सुरु भएको पहिलो दुई दिने राष्ट्रिय परिषद् बैठकमा पत्रकार र सुरक्षाकर्मीलाई प्रवेश रोक लगाइएको हो ।

सिरहाको लहान ७ स्थित मारवाडी सेवा सदन जारी बैठकमा सहभागी सदस्यलाई नागरिकता अनिवार्य गरेको थियो । बैठकमा मोबाइल निषेध गरिएको छ। सञ्चारकर्मीलाई बैठक स्थलमा रोक लगाइएको छ ।

परिषद् बैठकका लागि स्वतन्त्र मधेस गठबन्धनका संयोजक राउत बिहान ७ बजे जनकपुरबाट लहानस्थित मारवाडी सेवा सदनमा आएका थिए। उनको प्रवेशसँगै कार्यक्रमस्थल मारवाडी सेवा सदनको सुरक्षा कडा पारिएको छ।

मूल गेटबाटै राउतका आन्तरिक सुरक्षा दस्ताले कार्यक्रमस्थलको सुरक्षा दिइरहेका छन्। सशस्त्र र नेपाल प्रहरी मूल गेट बाहिर सडकमा उभिएर बाहिरी सुरक्षा दिइरहेका छन्।

कार्यक्रमस्थल मारवाडी सेवा सदनभित्र प्रवेश गरेका नेपाल प्रहरीका दुई जनालाई राउतका कार्यकर्ताले बाहिर निकालिदिएको स्रोतले बताए।