तनहुँ । तनहुँको व्यास नगरपालिका वडा नम्बर ४ सिमलटार स्थित डसना उद्योगमा आज बिहान आगलागी हुँदा २२ लाख रुपैयाँ बराबर सामानको क्षति भएको छ ।

राम बहादुर विकले संचालन गरेको बेथेल इन्जिनीयरिङ प्रालि डसना उद्योगमा वेल्डिङ गर्दा विद्युत चुहिएर आगलागी हुँदा २२ लाख बराबरको क्षति भएको जिल्ला प्रहरी कार्यालय तनहुँले जनाएको छ ।

आगलागीबाट उद्योगमा रहेको प्राय सामान नष्ट भएको प्रहरीले जनाएको छ । बिहान साढे ८ बजे लागेको आगो नेपाली सेना, नेपाल प्रहरी र स्थानीयवासीको सहयोगमा ११ बजे नियन्त्रणमा आएको जिल्ला प्रहरी कार्यालय तनहुँका प्रहरी नायब उपरीक्षक श्यामु अर्यालले जानकारी दिए ।

टिनले छाएको घरमा सञ्चालित उद्योगमा लागेको आगो निभाउने क्रममा घरको केही भागहरुमा समेत क्षति पुगेको छ ।

आगो निभाउने क्रममा डोजरको सहयोगले घरको केही भाग भत्काइएको र व्यास नगरपालिकाको दमकलको समेत सहयोगले आगो निभाइएको डिएसपी अर्यालले बताए ।

आगलागीमा कुनै मानवीय क्षति भने नभएको उनले बताए ।