पोखरा महानगरपालिकाले पोखराका मुख्य मुख्य चोकहरुमा रहेका ठूला आइल्याण्डलाई हटाउने काम जारी राखेको छ । बढ्दो सहरीकरणका कारण ट्राफिक व्यवस्थापनमा कठिनाई पर्नुका साथै सम्भावित दुर्घटना न्यूनीकरणका लागि पोखराका मुख्यचोकका आइल्याण्ड हटाउन थालिएको हो ।

पृथ्वीचोक, अमरसिंहचोक, जिरोकिमिको पहिल्यै हटाइएको हो भने पछिल्लो क्रममा वीरेन्द्रचोक, विरौटाचोक, हरिचोकको हटाइएको थियो । पोखरा महानगरपालिकाले सञ्चालन गरेको अभियान अन्तर्गत आज मुस्ताङचोकमा रहेको आइल्याण्ड हटाइएको महानगरका प्रवक्ता गङ्गालाल सुवेदीले जानकारी दिए ।

आज बिहानै स्थानीय जनप्रतिनिधि, नगरपालिकाका कर्मचारी र सुरक्षाकर्मी सहितको उपस्थितिमा दुईवटा डोजरमार्फत आइल्याण्ड भत्काइएको थियो ।

पोखरा विमानस्थलको नजिकै रहेको आइल्याण्डमा नेपाल क्युनिष्ट पार्टीका नेता स्वर्गीय चित्रबहादुर गुरुङको अर्धकदको शालिक छ । आइल्याण्डलाई सानो बनाएर स्व .गुरुङको शालिक सोही स्थानमा राखिने प्रवक्ता सुवेदीले बताए ।