बहालवाला नेपाल प्रहरी महानिरीक्षक (आईजीपी) वसन्तबहादुर कुँवर सोमबार (राति १२ बजेसम्म)बाट अनिवार्य अवकाशमा जाँदैछन् ।

सरकारले आईजीपी नियुक्तिका लागि गृहकार्य शुरू गरेको छ । ७९ हजार बढी फौजलाई ‘कमान्ड’ गर्ने प्रहरी नेतृत्वमा पुग्न ३ जना प्रहरी अतिरिक्त महानिरीक्षक (एआईजी)हरू क्रमशः दीपक थापा, सुदीप गिरी र टेकबहादुर तामाङ दौडधूप गरिरहेका छन् ।

केन्द्रीय अनुसन्धान ब्यूरो (सीआईबी)का प्रमुख तथा एआईजी कार्यरत थापा, राष्ट्रिय प्रहरी प्रशिक्षण प्रतिष्ठान (प्रहरी एकेडेमी)का प्रमुख तथा एआईजी गिरी र काठमाडौं उपत्यका प्रहरी कार्यालय रानीपोखरीका प्रमुख तथा एआईजी तामाङ आईजीपीको प्रतिस्पर्धामा छन् ।

अहिले आईजीपीको प्रतिस्पर्धामा रहेका तीनै जना हालका आईजीपी कुँवरकै ब्याचको वैकल्पिक टोलीका रुपमा ११ भदौ २०५२ मा प्रहरी सेवामा प्रवेश गरेका थिए । यी एआईजीमध्ये थापा वरिष्ठतामा अगाडि छन् ।

२६ फागुन २०७९ मा एआईजीमा सिफारिस भएका दीपक थापालाई ६ चैत २०७९ को मन्त्रिपरिषद् बैठकले एआईजीमा बढुवा गरेको थियो ।

थापा एआईजी भएको दुई सातापछि गिरी र तामाङ पनि एआईजीमा बढुवा भएका थिए । १३ चैतमा सुदीप गिरी र टेकबहादुर तामाङ एआईजी बढुवाको लागि सिफारिस भएका थिए ।  गिरी र तामाङ २०७९ चैत २४ एआईजीमा बढुवा भएका हुन् ।

 थापा फिल्ड कमान्ड र अपरेसनमा अनुभवी अधिकृतको रुपमा चिनिन्छन् । गिरीसँग आतंकवाद तथा विशेष प्रकृतिका घटनाहरूको अनुसन्धान गर्ने विशेष ब्यूरोको एक दशक बढी लामो अनुभव  छ । इन्स्पेक्टर बेसिकको गिरी अलरान्ड फस्ट पनि हुन् । गिरी सर्वोच्च अदालतका पूर्वप्रधानन्यायाधीश केदार गिरीका छोरा हुन् ।

तामाङ प्रहरी एकेडेमी र अख्तियारका अनुभवी अधिकृत मानिन्छन् । तामाङ पूर्वडीआईजी देवीलाल तामाङका ज्वाईं हुन् ।

दीपक थापा नै नेपाल प्रहरीको ३१ औं महानिरीक्षक बन्ने लगभग पक्का भएको छ । रातभरिमा कुनै नाटकीय परिवर्तन नभए थापा नेपाल प्रहरीको नेतृत्वमा पुग्ने निश्चित भएको बताइन्छ ।

सोमबार बस्ने मन्त्रिपरिषद् बैठकले थापालाई महानिरीक्षक नियुक्त गर्ने लगभग पक्का छ । गृह मन्त्रालयको प्रस्तावमा मन्त्रिपरिषद्ले प्रहरीको महानिरीक्षक नियुक्त गर्छ ।

मौजुदा प्रहरी नियमावली, २०७१ को नियम ४१ अनुसार आईजीपी नियुक्तिको अधिकार नेपाल सरकारलाई छ । नियमावलीमा भनिएको छ, ‘एआईजीहरूमध्येबाट र एआईजी नभएको अवस्थामा डीआईजीमध्येबाट ज्येष्ठता, कार्यकुशलता, कार्यक्षमता, उत्तरदायित्व बहन गर्न सक्ने क्षमता, नेतृत्व प्रदान गर्न सक्ने कुशलता तथा आफूभन्दा मुनिको प्रहरीलाई प्रोत्साहन र परिचालन गर्न सक्ने सामर्थ्यको आधारमा नेपाल सरकारले उपयुक्त देखेको उम्मेदवारलाई आईजीपी पदमा बढुवा गर्नेछ ।’

नियमावलीले प्रस्टरूपमा एआईजीमध्येबाट ज्येष्ठता, कार्यकुशलता, कार्यक्षमतालाई महत्त्वपूर्ण मानेकाले थापा नै निर्विकल्प आईजीपीका दाबेदार हुन् ।

यही नियमावली विद्यमान रहेको अवस्थामा यी तीन जनामध्ये जो आईजी भए पनि ११ भदौसम्म कमान्ड सम्हालेछन् । त्यसपछि उनीहरू पनि ३० वर्षे सेवा अवधिका कारण अनिवार्य अवकाशमा जानेछन् ।