पोखरा । लोकगीत र मौलिक संस्कृतिको उर्वरभूमि मानिने गण्डकी प्रदेशको म्याग्दी जिल्लामा जन्मिएका लोक तथा दोहोरी गायक राजेन्द्र सापकोटाको ‘उठ्ने बेलाको’ बोलको गीतले दर्शकश्रोताको मन जित्दै गएको छ ।

बुधबार गायक राजेन्द्र सापकोटाको आफ्नै युट्युबबाट उक्त गीतको म्युजिक भिडिओ सार्वजनिक भएको हो। गायक सापकोटा र चर्चित गायिका देवी घर्तिको आवाजमा रहेको गीतको लय पनि गायक सापकोटाकै रहेको छ ।

गीतको शब्द भने लोकप्रिय सर्जक प्रल्हाद सुवेदीको हो । सुवेदीले सिर्जना गरेका गीत ‘नजाउ है सानु पँधेरीमा’, ‘शितल दिने पिपल समी छ’, ‘माया हाँसेको’, ‘खेतमा बोके झार’ लगायत यस्तै थुप्रै गीत रुचाइएका छन् ।

म्युजिक भिडियोलाई कुमार के.सीले निर्देशन गरेका छन् भने अमृत चापागाईंले सम्पादन गरेका हुन् । भिडियोमा विवश ठकुरी र सीता घिमिरेले स्क्रिन शेयर गरेका छन् ।

सापकोटाले गाएका ‘हाई हाई सम्झे मायालाई’, ‘बज्न थाल्यो सनाई’, ‘सोच आँखा बन्द गरेर’, ‘जवानीमा धक्का’, ‘पिरति मिसाउनी’, ‘छेकी छेकी’, ‘डाँडै भयो अल्को’, ‘सालैजो’ लगायतका गीतहरु लोकप्रिय छन्।