नवलपरासी । पश्चिम नवलपरासीमा प्रेम विवाहको विषयमा दुई पक्षबीच झडप हुँदा १९ जना घाइते भएका छन् ।

पाल्हीनन्दन गाउँपालिका–३ बेलासपुरमा आज बिहान ९ बजे भएको झडपमा प्रहरी र स्थानीय बासिन्दासहित झन्डै १९ जना घाइते भएको प्रहरीले जनाएको छ ।

केही महिनाअघि गाउँकै युवा र युवतीबीच भागी विवाह भएको र विवाद बल्झिएपछि दुई समूहबीच झडप भएको प्रहरीको भनाइ छ ।

प्रहरीका अनुसार हिजो बेलुकी स्थानीय दुई व्यक्तिबीच हातपात भएको र त्यही विषयलाई लिएर आज बिहान तनावको अवस्था बनेको हो ।

इलाका प्रहरी कार्यालय महेशपुरको बा१झ ७४४८ नंको गाडीमासमेत आगजनी भएको छ । नेपाल प्रहरीका ११, सशस्त्र प्रहरीका चार र स्थानीय चारजना घाइते भएको प्रहरीले जनाएको छ ।

अवस्थालाई नियन्त्रणमा लिन प्रहरीले केही राउन्ड हवाई फायर समेत गरेको छ ।

झडपमा घाइते भएका पाल्हीनन्दन गाउँपालिका–३ कुश्माका ३५ वर्षीय विजय धवलको अवस्था गम्भीर रहेको प्रहरीले जनाएको छ ।